الشاعرة المبدعة عزة علي قاسم تكتب ام في مسرح الزلزال

 ((أم في مسرح الزلزال))

ببيتنا .. قاعدين

أنا و ولادي احمد وعمر وياسين

عم نرسم حلم ومستقبل 

بدفا الرب عايشين ..

وعلى الخبز والزيتون

بنشكر الله ورضيانين ..

صحيح البيت من كتر القصف والقذائف 

مصدع وتاكي حزين..

لكن مش سائلين ..

عايشين وشاكرين حامدين..

أنا وأطفالي كنا بهنا حاسين

وبدارنا مستورين..

علمتهم كيف يرسموا الوطن بقلم تلوين

وفهمتهم كيف يعيشوا قانعين 

وبنعمة الله راضين ..

وبيوم أحمد قلي يا أمي ..

ليش ماعندي لعب مثل رفقاتي ؟

مش أنا بعدني طفل صغير ؟

ليش حملت الهم ع بكير..؟؟؟

قلتلو يا أبني بوطنا سوريا 

مافي طفولي

بنخلق رجال 

رجال يا أمي

لنكتب تاريخنا

لنكتب مجدنا 

ولرفع الظلم دايما مهيئِن مستعدين..

وبلحظة رعب...

اجا الزلزال اللعين

صرخت...

صرخت.. يا رب تعين 

وبلمح البصر ..

صرنا ضايعين ندور ع ضايعين

وتمسكت بولادي المساكين

كانو نايمين ومش دريانين 

ومن تحت الركام 

صوت صرخات المستضعفين

والكل عم يستغيث يااا الله

وماعاد عرفت مين عم بيدور ع مين 

يمكن طلعت روحي

يمكن أنا فوق عند رب العالمين ..!!

أنا الأم المنكوبة 

أنا الأم الي دم ولادي على ثيابي

حلفت .. وحلفت.. ليضل

لشوف ولادي عايشين ولا ميتين

آخ لك آخ...مشغولة عم دور وبنادي 

والصوت مخنوق وينكم يا ولادي

ردوا .. ردوا عليي أحمد عمر ياااسين 

و الحقيقة مرة يا وطن ..الحقيقة مرة ياوطن

أنا أم بلا ثمن 

غريبة بهل وطن

مابعرف أنا وين بالسما ولا تحت الهدم

ومن وين بلش دور

ويا مين يساعدني بدي ولادي ..بدي ولادي

مش فاهمي مين راح أنا ولا الوطن

الله اكبر الله اكبر يارب الوجود..

بكرمك وع

طفك علينا جود

وصوت الحق لا بد يعود ..

✍ .....عزة_ علي _قاسم