....((( دنيا غريبه )))......
وقت الشده تبان الاصحاب
و وقت العوزه فينا الكداب
فينا الفالصو و فينا الماس
فينا الاصلي و فينا نحاس
وفينا البارد و فينا الحساس
وياما الدنيا شايله ناس
لا هو بالمال ولا باللباس
دنيا غريبه عجيبه يا ناس
فينا الاخ بيقتل أخوه
و المحتاج فينا يعايروه
أما الغني يجروا يحايلوه
دنيا غريبه عجيبه يا ناس
وقت الشده يبان الأصل
وأحنا حقيقي بجد في مصر
فينا عجايب مالهاش حصر
فينا نخوه ولو في الأسر
وفينا شهامه ولو ف الحصر
ناكل دقه و لو ب رغيف
ولا نقبلش حرام يا خفيف
لأجل القلب يتنه نضيف
حتي أن قالوا يقولوا شريف
دنيا غريبه عجيبه يا ناس
تلقي الواحد وقت الجد
رغم العوزه قوي و بجد
يرفض يخد حاجة من حد
وأما يلاقي حد ف أزمه
وسط النار يمد له أيده
وناس ف الازمه مالها لازمه
تجري وتهبش من غير رحمه
دنيا غريبه عجيبه ياناس
طول ما الحق بينا طريح
تلقي الباطل فينا فصيح
نفضل كده في مهب الريح
فين العدل فين الإنصاف
إبن الباشا جاهل وسخيف
ده يتغطي ينام ع الريش
وده من جوعه ينام ع الخيش
دنيا غريبه عجيبه ياناس
ذاكر و أتعب و أياك تحلم
وقت حصادك أنك تكسب
أصل الباشا أبوه في المنصب
لسه بيحكم في باب المندب
وأنت ابوك ع الباب متأدب
فين العدل فين الإنصاف
ناس تتعشي فيليه و كباب
وناس من جوعها بتاكل حاف
دنيا غريبه عجيبه ياناس
أمتي يكون الناس للناس
وأمتي يكون الحب أساس
و القدرات تتشال ع الراس
و الأخلاق و الدين نبراس
ده الإصلاح محتاج لميزان
و القانون يحتاج ألزام
عدل وحكمه في كل ميدان
بين العامل و بين السلطان
لأجل ساعتها نعيش ف أمان
أخلاق واحده في كل مكان
روح ومحبه في كل زمان
دنيا غريبه عجيبه يا ناس
لأجل نطير ف بساط الريح
و يفضل بينا الحق صريح
من غير ضعف ولا تجريح
حب لاخوك ما تحبه لنفسك
وأياك تقبل شئ علي غيرك
عمر ما تقبله به علي نفسك
حاسب نفسك ليل و نهار
و أياك يوم تعيش غدار
أو خاين للعيش و الملح
مهما قابلت من الاشرار
و لا صادفت من الاقدار
ده كل ليل وطالع له نهار
و أوعي تفكر أو تحتار
كل مشيئة و ليها أسباب
فيها الحكمه وفيها عظات
و ده كله تدبير مولاك
وقت الحاجه تملي معاك
دنيا غريبه عجيبه يا ناس
كلمات الاديب الشاعر.د/ السيد علي القن
ليست هناك تعليقات:
إرسال تعليق