الشاعر اشرف الشناوي يكتب بداية ونهاية

 .....بدايه ونهايه........

ارمى الوجع ورا ضهرك 

الحزن يابنى بيهد الجبال 

وبيكسر القلب كسر 

عيش الحياه واوعى البكا 

ياخدك معاه 

يرميك فى سجن المحرومين 

يحبسك فى الخوف سنين 

يقلع الحلم اللى زارعه 

جوا منك 

يمسح الضحكه 

اللى طلت فوق ملامحك 

او يدوس كدا بالغشم 

فتحس جرحك 

او ينتش فى الامانى 

او يفتش فى الاغانى 

او يسيبك برا روحك حد تانى 

كمل المشوار بلاش

حتى لو خلوك معاش 

بالامل هتحس انك 

لسه عايش جنب ضلك 

وان بكره لسه جى 

فوق كفوفه الحلم حى 

وان قلبك لسه بيدق انتظام 

وابتسم لو حتى كل الجى مر 

كل مر اكيد بيمر  

غربل الاحزان وهز  

شد صبحك 

م اللى عاوزين يخطفوه  

او يشيلوا الحلم منك يخنقوه  

مد ايدك جوا بق المستحيل 

واوعى ترضى فى يوم 

تعيش ابدا بديل 

ايوا عافر  

لما توصل للنهايه 

بكره هاتحس ان وجعك

 كان بدايه

 لشئ جميل ..............

اشر

ف الشناوى

شاعر عاميه

البرامون

المنصوره