يلا نتسامح
*********
بقلمي✍️السيد عطاالله
الأخ بقا يعادي أخوه
ما عملش خاطر لأبوه
علشان الفلوس عموه
الدنيا فانيه وكله فاني
يا نبتة الحب فين الاقيك
تظللي عليه و أظلل عليك
يا نبته في الجنه أراضيك
من غير حب و الله بنعاني
اهي نبتتنا ف قلوب حاضره
مزروعه في قلوبنا بالفطره
لو ماتت على القلوب حسره
لا تنزع أبداً من قلب حاني
النبته هنا موجوده
لكن الفرحه موؤده
بقلوب بقت سوده
ما فيها خير للتاني
نبته اه لو كنا بس ننميها
بمية ود مع رحمه نرويها
دنياك ابدا ما تبكي عليها
جايز يتبدل الزمن تاني
ليه كله عايش لمصلحته
فيه أخ ياكل ورث أخته
لما يغتني نقول يا بخته
كله عايش طماع أناني
كفايه يا دنيا عمت الناس
عجبي على أصيل يداس
أما ندل يتشال ع الراس
رغم كده و عندي أماني
هزرعك يا نبتة المحبه
صبري بقلبي يستخبى
أسقيك رحمه و موده
نعزف محبه مع أغاني
إيه رأيكم كده لو نتصالح
ندوس على كل المصالح
من يكبح جماح طمع فالح
ننسى مين اللي كان جاني
نعود حبايب و اخوات
ننسى عداوه زمن فات
نجدد أملنا فيما هو ات
اخلي السماح عنواني
كلمات السيد عطاالله.
ليست هناك تعليقات:
إرسال تعليق